كرونيك قدرنا ان نفترق

الحلقة 01

زيد : (ضربها بالشوي  على فمها ) ماتزيديش تهدريها الهدرة هذي يا مجنونة  نجيب حبيبتي بالبارود و الشرط و الشهود و نديرلك عرس 7 أيام و 7 ليالي أصبري برك مابقاش بزاف .

كاميليا : نصبر ؟؟ شحال نزيد نصبر ! 8 سنين الناس كل عادت تعرفني بيك شكون ماشافناش مع بعضانا ولا مايعرفش الي بيناتنا أمك برك ماهداهاش ربي . 

زيد : والله يا عمري قريب ديري فيا لاكونفيونس ...

صفاء : أحم أحم ( طبطب في الباب ) هيا برك أسيدي راح تفضحوني ولا واش ماما قريب تجي ... واقيلا نولي نكريهالكم لاشومبر هذي بساعة و ندير على ظهركم شوي صوارد ...

زيد : ربي يعيشك يا بنت عمي الزينة تخطايني انتي نضيع ههههه درك نهدر مع المخلوق يخليك تزيدي معانا شوي ... تزوجي أنتي  نتشردو ...

كاميليا : امممواااح حبيبتي

صفاء : هيه حبيبتك تزوجو برك و هنونيييي من همكم ...

نحكيلكم درك عليا أنا كاميليا 25 سنة قاعدة في الدار حبست في الباك ... بيضاء و قصيرة و سمينة شوي ملامحي عادية، طفلة وحدة و عندي 3 خاوة زين الدين أصغر مني 20 سنة (ديدين) نور الدين الكبير 35 سنة متزوج و نصر الدين أكبر مني بعامين 27 سنة خطبنالو زرزومية ... حنا عائلة متواضعة بابا يخدم ميكانيسان الحمد لله ماعندناش و مايخصناش ...

نحكيلكم درك على زيد حبيبي 30 سنة يخدم عسكري بطل القرايا كي مات باباه و راح للعسكر باه يصرف على أمو (دوجة) و أختو (سارة 27سنة ) أسمر و طويل و أنا نعشق فيه حكايتنا حكاية ... أول مرة نشوف أم موش باغية تزوج ولدها و تفرح بيه كانت تقلو ماتزوجش حتى تزوج أختك ... هذي 3 سنين يحاول فيها بلا فايدة ... (زيد ولد عم صفاء الي كانت جارتنا الباب في الباب و صديقة الطفولة تاعي تقدرو تقولو كنا دار وحدة صفاء عندها خوها واحد أسمو سامي كان قد خويا ديدين و صاحبو) .

 أنا كنت نرفض الخطابة الي يتقدمولي كل على خاترو و أنا درك بديت نكبر و نشوف صحاباتي و تراباتي كل تزوجو غير أنا نعرف أنو 27 سنة موش بزاف بصح الله غالب هذا هو المجتمع كرهت حاجة أسمها "وااش كاش خطبة ؟؟ كاش راجل ؟

<><>

الحلقة 02

زيد قرر المرة هذي يتخذ قرار و يدير موقف بعد ما تعارك مع أمو على نفس الموضوع جاء ودعني و قالي المرة هذي نطول مانروحش ماتتقلقيش عليا ... بكيت و قلقت خاتر والفت كل 40يوم نشوفو واش راح يصبرني عليه ..

راح زيد و ماهدرش مع أمو مدة تاع 20يوم كان يضغط عليها باه تقبل تخطبلو و هداها ربي و قبلت تخطبلو ...

زيد : حبيبي عندي ليك خبر ...

كاميليا : أهدر طيحتيلي قلبي ..

زيد : وجدو روحكم البارمسيون هذي نجيب العجوز و نجي نحبك ..

حبيت نزغرت و حشمت كانت أكبر فرحة في عمري ...

فاتت ليام و جاء زيد خطبني ...

ماما : تفضلو تفضلو مرحبة بيكم ...

دوجة : ممممم يزيد فضلكم ..

دخلت أمو و أختو من الباب هازين خشومهم يشوفو معانا بطرف العين جات معاها طاطا أم صفاء بحكم أنها جارتنا و مرت عم زيد ..كان الجو مكهرب ماما ماعجبتهاش طريقتهم في الهدرة و التكبر و أم صفاء غير ترطب في الحالة و أنا في بيتي ندعي في ربي تفوت على خير بصح كرههم ليا كان واضح وجدنالهم خير كبير و هم جاو بيديهم (بمعنى الكلمة )

سارة : ههههه خويا شرالنا الورد و الباتيسري و نسيتهم في الدار هههه

ماما : ماعليش يا بنتي وجهكم خير ..

دوجة : تحت خشمها مع بنتها "ماصدقو "

كلاو كل شيء تقول خرجو من جهنامة و مازالو ما فتحوش الموضوع الي جاو على جالو وصلت 17:30 و أنا تقلقت و بدات تغيضني روحي ...

سارة و دوجة : معريفة خير نروحو حنا برك ..

ماما : غير مشوكيا ...

أم صفاء : واش بيك يا دوجة ..!!! قوليلهم سع على واش جيتو ...

دوجة : إييييه صح جينا نخطبو بنتكم لولدنا ...

ماما : ممممم زيدي قولي ولدك واش يخدم و كيفاه ؟؟؟؟

دوجة : بووووه راكم علابلكم بكل شيء ...ولدي عسكري و خدام بعيد و بنتكم راهي تسكن معانا باه نتفاهمو في الضوء ..

ماما غير تشوف حايرة ....

أم صفاء : هههههه مازال عليه الحال الهدرة هذي ربي يسهل و يكمل و خلاص ...روحي روحي جيبي العروسة يشوفوها ...

ماما جات عندي و الحزن واضح على وجهها في فمها هدرة ...قاتلي هيا تروحي تشوفك ...

دخلت عليهم سلمت و قعدت و هما كأنهم موش قاعدين يشوفو فيا كنت نحكم في دموعي بالسيف حسيتهم حڨروني ...

<><>

الحلقة 03

أم صفاء : الله يبارك على كاميليا زين و الدين والا واش قلتي دوجة ( نكشتها )

دوجة : هههههه صح الله يبارك ...

ماكانش 10دقايق هزو بعضاهم و راحو روحو ...

ماما : هذا هو الي بغيتيه ؟

هبطت راسي حشمانة ..

ماما : نقلك درك في الضوء هذي الحالة ماتفرح ...

هدرت مع زيد و حكيتلو كل شيء كنت نبكي حسبت النهار هذا يكون أسعد يوم في حياتي ...

زيد : وين كنا و كيفاه ولينا يا حبي أصبري برك تعرفي أني نحبك كل شيء يفوت كي تجي عندي و يوالفوك و يعرفوك أكيد يحبوك ..

هدرة زيد ديما تكالميني نحبو موش بيدي ...

جاو أعمامو و جدو هدرو مع بابا الي كان عجبو الحال على خاتر بابات صفاء كان صاحبو و جارو هذي مدة و سنين ...

المهم جاء عرس صفاء و كنا دار وحدة جريت معاها كل حاجة عملتها أنا و هي الحلو و الجهاز تاعها حتى من الميناج ...نهار العرس ...أم زيد قريب تفلقني بعينيها اول مرة نحس بكره إنسان ليا ماسقستنيش حتى على حاجة أما سارة المسمومة حتى التسلام ماسلمتش عليا و أنا كنت فرحانة مع صفاء و زاهية كأنو عرس أختي و هي كانت دايرتني أختها كل حاجة تسقسيني أنا عليها و بنت عمها (سارة ) قريب تغزل ...

زيد : أرواحي أني في الكوزينة ..

كاميليا : موش قاعدة حبيبي ...

زيد : هيا هيا عمري بناتنا 5ميترات و مانشوفش مرتي ؟

انا كنت لابسة غوب سواري روز ميني و عاملة كوافير و ماكياج يقتل جيت نهبل ....

رحت للكوزينة عند زيد و غير شافني قفل الباب بالمفتاح ( كان فض وقت العشاء و روح الطباخ ) قوليلي واش نديرلك ...ناكلك و لا !!! عمري تهبلي ..نموت عليك ..واقفين مع الحيط محضني عندو يبوس فيا و أنا ذبت معاه كان راح ياكلني يحضن فيا و يبوس على رقبتي حتى خلى فيها لاتراس ...

كاميليا : مجنون يووووون واش عملتي كيفاه نخبيها ؟؟

زيد : ههههه خليني نزيد ندير وحدة في بلاصة مدرقة ..

كاميليا : تحلم حل عليا الباب نروح ..

زيد : نحبك وقتاه نزوجو خلاص الصبر ...

كاميليا : مابقى والو يا حبوبي ...

رجعت للصالة درڨت الزروقية هذيك ب كيلو فوندوة و مازالت باينة و عاودت الروج ألافر الي كلاه زيد كامل و رجعت و أنا باين عليا السعادة و فرحانة بحبيب قلبي. ...

حبي لزيد خلاني نصبر على خدايم أمو و أختو الي فضحونا في لافامي نهار الفاتحة و المشاكل الي كون نبدأ نهدر عليها لا تعد و لا تحصى خدمنا أوراق العقد و عقدنا و قرب عرسي ...

<><>

الحلقة 04

زيد : حياتنا كلها راح تكون فرحة و خير ....توضينا صلينا 2ركعات شكر لله كيما قال هو ...

رحت لبست نويزات بيضاء قصيرة جيت فيها دبدوبة صح بصح أنوثتي كلها باينة علاقتي مع زيد صح8سنين بصح عمرها فاتت البوسة و التحضينة و التملميس فوق القش أول مرة يشوفني عريانة ....

قاعد على طرف السرير و غير يشوف معايا فاتح فمو و يشوف ...

كاميليا : بزايد زيد حشمتيني ...

زيد : خليني نبرد قلبي خليني نشبع عينيا من الزين و لاطاي الي عطاهملي ربي .. وقف قرب عندي ....تعرفي حبي ...هذي 👙 تحت القش تبان مليحة و من غير قش تقتل ...حضني لصدرو بكل حنانة و تفنن في الحب معايا الليلة هذيك فضت بدليل طهارتي فرح هو و أنا و الحمد لله يا ربي حسيت روحي دخلت للجنة و أنا مازالني في الدنيا ماكنتش نعرف واش راه يستنى فيا ..

فاتت 15يوم و حنا عرسان جدد هايلين حب في حب في حب رغم نظرات أمو الي كيما تاع الشيطان بصح كنت طايرة بالفرحة و هو كيف ....

النهار الي لم فيه الكابا باه يرجع للخدمة كان نهار العزاء عندي كانت بداية أحزاني و عذابي ...

راح حبيبي و بقيت في وسط ناس قلوبهم كحل و مليانين غل ...جربو يا خاوتي فيا كل أنواع العذاب في شهري الأول ...عجوزتي يا حضرات تاكل هي و بنتها و يغسلو المواعن و يقفلو الفريجيدار بالمفتاح هو و الكزينة و يخرجة صبرت الأيام الأولى كنت مرجعتها على السقايط الي يبعثوهملي خاوتي و نهدر مع زيد يسقسيني على الأحوال نقلو كل شيء هايل ماحبيتش نقلقو ..

فات شهر و جاء زيد و عملهالي مفاجئة دخل على 00:00 تاع الليل جاب شوي حوايج باه يحطهم في الكوزينة لقاها مغلوقة حوس على المفتاح الدوبل فتحها جاء يشوف الفريجيدار لقاه حتى هو مغلوق ...

دخل عندي للاشومبر و هو حزين يعرف خدايم أمو ...باسني على راسي باه فقت كي شفتو طرت بالفرحة نحضن فيه و نبكي و هو كيف كيف لقاني ضعفت ...

زيد : راكي مليحة ؟؟

كاميليا : كي شفتك راني هايلة ...

زيد : واش عملو فيك ؟؟

كاميليا : والو ملاااح ...

زيد : ماتكذبيش عليا ...

هبطت راسي و قتلو على. خاترك نستحمل كل شيء نموت عليك ...

حضني و طلب مني السماح و قالي أصبري حتى يفرجها ربي ...

<><>

الحلقة 05

غدوة على الصباح تبدلت عقلية أمو و أختو 180° قمة النفاق جاونا للاشومبر و جابولنا الفطور و الضحك و الهدرة المليحة و زيد حشم يهدر مع أمو على حكاية الكوزينة ...

فاتو العشر أيام ولا في الأحلام حوس بيا و شرالي كل شيء نحبو و أمو و أختو لابسين الماسك تاع الناس ملاح ...

راح زيد يخدم و بدات المعاناة تاعي من جديد كيف كيف مابقاوش يقفلو الكوزينة بصح الفريجيدار ديما مقفول عمرهم خلاوني طيبت ولا عيطولي كليت الهدرة معايا غير بالتشناف و زادت المعاناة وليت نلقى حوايجي و صواردي ينقصو مرة ملابسي الداخلية الريحة و الماكياج وليت حتى أنا نقفل بابي بالمفتاح في الدخلة و الخرجة ...الشهر الثاني هك و الثالث و الرابع و تطورت الحالة للمشاكل و الهدرة و العراكات و ماشية غير تزيد الحالة و أنا نقول لزيد غير الحاجة القليلة مانقولش كل شيء ...

حتى نهار جاء عرس عندهم في لافامي و عرضونا كل امو قاتلي ماتروحيش معانا بصح أنا حبيت نروح هدرت مع زيد و قالي روحي لداركم وجدي روحك و قولي لخاوتك يوصلوك ...و أمو هبلت مالقات كيفاه دير كي شافتني عادلة و لابسة... الليلة هذيك بتت في دارنا لغدوة كي روحت طلعت لافاليز تاعي تاع القش للدالة نشرت قشي أكم تعرفو من بعد العرس ..

صليت الظهر و طلعت للدالة نجيبو و ثم كانت المفاجئة ...

نجي نشوف نلقى قنادري تاع5ملاين و 6ملاين و كل محروقين بلاسيد معلقين في الحبل و محروقين أنا من الصدمة طحت تغاشيت...(ماقلتلكمش أنا بالحمل عندي 3شهور )

بقيت مطيشة هكاك حتى فقت وحدي هبطت نلقاهم مجمعين في الصالة و شايخين بالضحك ....

مالقيت واش ندير بديت نتعارك و نسب و نعيط بالصوت الي عندي بكيت و بكيت و ندبت حتى وجهي و هم لاحياة لمن تنادي يهود في قش مسلمين غير يضحكو عليا و يعايرو فيا يا الق*** يا القضلة حتى شبع فيك ولدنا باه جابك ...و يا كافية الي ماتعرفيش تلبسي فضحتينا في العرس بقشك المبهدل و أنا والله تصديرتي كل تهبل غير ليمودال الجدد الملاح عيطت لبابا و ماما جاء داني و ديت معايا قشي المحروق كل .

ماما شبعت فيهم بالسبان و المعاير و هم جاتهم على قلبهم كي العسل الي بغاوه وصلولو ...

<><>

الحلقة 06

النهار هذاك زيد كان مروح و أنا من الصدمة و لاطونسيون الي طاحتلي ماهدرتش معاه و ماقتلوش الي صرى بطريقتي بصح عيطلو خويا نصر الدين و كان أكثر واحد متهور في خاوتي قالو روح لم القح***الي عندك و أرواح أدي بنتنا ...زيد هبل و مافهم فيها والو أنا ماهدرتش معاه و كي روح زادت أمو و أختو حكاولو مسلسل أوخر انو بابا دخل عليهم و سبهم و ماما ضربت سارة ...لغدوة جاء عندنا للدار ...دخلنا للشومبرة تاعي و بديت نحكيلو في الحكاية كيفاه صرات و نعتلو قشي و هو تحطم قلق و هبل و مالقى حتى حل ..#daddou

حكمو بابا على جنب و قالو بنتي ماتزيدش ترجع عند أمك روح كي تعمل حل أرواح أدي مرتك ...بقى زيد بين الجنة و التار منا تحرق منا تشوي ....أنا قعدت نهدر معاه في البرطابل و هو وعدني المرة الجاية كي يجي يكريلي دار ...هذا هو الحل الوحيد ...

رجع زيد بعد شهر و كرالي دار و جاء عندي يديني نلم حوايجي باه نرحل ....

و أول ما دخلت لهذيك لاشومبر تشوكيت يا خاوتي الماكياج مدقدق في الأرض قشي في الخزانة محروق بالجافيل و الي موش محروق مقطع بالمقص باقية غير نبكي و مشوكيا في اليهود الي طيحني ربي فيهم و أمو تسب فيا و أنا سكتت و ووكلت عليهم ربي خرجنا تحت دعاويها تاع الشر و قشي الي طيشتو في الزبالة أكثر من الي ديتو معايا ....

رحلنا لدارنا و حمدت ربي و قلت آخر الهموم إنشاء الله خويا يجي يبات معايا في الليل حتى روح زيد ...كنا فرحانين و ماهنيين حتى عيطت أمو

زيد : ألو يما لاباس ؟

دوجة : لاباس يا وليييدي ..واينك ماجيتيش ..؟؟

زيد : أني هنا وين راح نجي ؟

<><>

الحلقة 07

دوجة : راني يا وليدي ماعنديش من غيرك في الدنيا يطل عليا و يشوفني ...

زيد : انتي الي بغيتي يا يما ..

دوجة : خلاص يا وليدي بيض قلبك راني ميمتك جيب مرتك و أرواح تتعشاو اليوم عندنا قريب يولد حفيدي نخاف مانشوفوش ..

زيد : خلاص يما لعشية نجي ...

كاميليا : روح وحدك مانيش رايحة ..

زيد : ربي يخليك عمري راهي تشف خلي نروحو ...

كاميليا : بعد الي عملاتو كل بغيتيني نزيد نروح ..

زيد : نعرف قلبك أبيض ...المسامح كريم ..

كاميليا : خلاص نروحو ناكلو اللقمة و نروحو ..

زيد : أمممموح يا يما القلب لبيض الي عطاهولي ربي نحبك ..

وجددت روحي رحت للعشاء الملعون دخلت سلمو عليا قعدوني في الصالون الي من الي تزوجت ماقعدتش فيها ...فرحو بينا كأنهم خاطي نفس العباد سبحان الله ....

حطولنا العشاء تعشينا و كيما تفاهمت مع زيد روحنا الليلة هذيك حصل ما لم يكن في الحسبان بايتة أنا و زيد رايحين جايين على التوالات القيء و لادياري قريب نموت حتى شكيت انهم سممونا و ياليتهم سممونا و لا الشيء الي عملوه فينا ...

حكمنا بلاصتنا هو يجي يحط يدو عليا زيد و أنا نعيط بعدني أخطاني قيلني و هو غير يسكت فيا و يقلي خلاص ...الليلة هذي كل واحد فينا بات في بيت وحدو ...لغدوة زيد راح يخدم و فات الشهر هذاك عادي نهدرو في البرطابل بصح أنا كنت نحس قلبي برد من جيهتو ...

روح زيد مع الزيادة تاعي.... جاتني صعيبة صح و تعذبت بصح فاتت الحمد لله و جبت ولدي حبيبي معاذ ...زيد طاير بالفرحة بولدو و انا نشوف في الحيط في الأرض و موش حاملة نشوف في وجه زيد نتخيلو شيطان وواقف قدامي ...لا علينا ...10أيام يطل عليا أنا وولدو و أنا في دارنا هو يهدر معايا و أنا نتشنف عليه و هو يقول ممكن من النفاس و التعب تاع الولادة حتى وصلت وين تقلي ماما راهو جاء زيد نقلها قوليلو راهي راقدة و رجع زيد يخدم و أنا حتى الهدرة في البرطابل بطلت مابقيتش نهدر معاه...و هو مرات يتقلق يهدر مع خويا نور الدين مرات يهدر مع ماما و أنا خلاص موش حاملاتو ...كملت االربعين و قريب شهرين و روح زيد مقرر يديني نروح للدار درت حالة بالبكاء نقول لماما ماتخليهش يديني معاه خليني نقعد هنا بصح ضغطو عليا الناس كل و قالولي روحي مع راجلك ...

روحت للدار معاه كل واحد يشوف في جهة ...

<><>

الحلقة 08

زيد : قوليلي واش بيك هذي مدة و أنا صابر عليك فهميني .

كاميليا : مابيا والو أخطاني برك ...

تعشينا تقول ناكلو في الرهج و جاء وقت النوم هو جاء يحضني و أنا نضت وقفت ...

زيد : واش بيك ؟؟

كاميليا : ماتمسنيش ...

زيد : هبلتي علااااه ؟

كاميليا : كرهتك قيلني أخطاني ...

حكمني زيد بالقوة باغي يبوسني بدأ يبوس فيا و أنا نضت نبكي و نعيط و نقطع في شعري و قشي رحت للكوزينة نجري هزيت موس نقلو تقيسني نذبح روحي ...

هو يقلي شهدي و أستغفري و أنا نعيط عليه لبست جلابتي و صباطي و خارجة على 11 تاع الليل و هو يهدي فيا و خايف موش مصدق الي راني نعمل فيه ولدي يبكي فاحم و هو يمدلي فيه و أنا نقلو بعد عليا الحنش بعدو عليا حليت الباب خرجت و هو هز الطفل في الزاورة و يتبع فيا و أنا نمشي و نبكي حتى وصلنا لدارنا و المسافة كانت طويلة و كان البرد والله ماحسيت بالطريق كنت لابسة الجلابة فوق النويزات و الجليدة تصب و أنا موش فايقة مع روحي ...

<><>

الحلقة 09

وصلت لدارنا طبطبت و كانت 12 حلو عليا و هم مخلوعين غير وصلت لدارنا فقت مع روحي واش راني ندير كنت نبكي عند ماما و بابا و خاوتي يسمعو لزيد و موش مصدقين و يبهدلو فيا ...خلاني زيد و راح للدار ...

لغدوة هزني بابا و داني للراقي و يا خاوتي الي صرى فيا.... زيد و بابا حاكميني و ماقدروش عليا كنت نخبط و نعيط و نسب فيها حتى نطق الشيء الي فيا ...قاللهم راني موكل بالسحر باه نفرق بين المرأة هذي و راجلها و نكرهها فيه ...كان سحر يهودي و صعيب أنو يتفك ...

سمع زيد كل شيء بوذنيه تحطمنا في زوج كان محضني و يبكي يقلي 8سنين نستنى فيه و كي وليتي حلالي باغين يفرقو بيناتنا ...رجعت معاه للدار و أنا ديما حاطة الرقية في الدار و تحسنت شوي الحالة تاعي ..

جاء الكونجي تاعو و حالتي زادت رجعت كي قبل وليت مانخليهش يرقد معايا و نحب نخرج من الدار كي يجي يقيسني ...

روح نهار حطيتلو يتغدى بصح هو قالي شبعان سقسيتو واش كلا قالي تغديت عند يما ..

أنا غير سمعت الي قالو شعلت فيه كليتي الرهج عند أمك السحارة وعلاه تروح عندهم قتلك ماتزيدش تاكل عندهم .. و ردة فعلو المرة هذي غير كل مرة حكمني عطاني طريحة تاع الكفر زرقلي كامل وجهي و لحمي كان كي المجنون يضرب فيا و يقلي هذي باه ماتزيديش تهدري على يما و هذي باه ماتزيديش تجبدي أختي المهم حتى فقدت الوعي بين يديه ...

هو ثم برك فاق مع روحو واش عمل ...عيط للحماية المدنية داوني للسبيطار و من بعدها عيط لدارنا ..

جاوني للسبيطار و ماصدقوش عينيهم كي شافو حالتي ماما غير تبكي و خاوتي حلفو فيه يقتلوه ...و نعرفهم مهابل و يعملوها ..

تفاهم ديدين و نصر الدين يحكموه يفتفتوه يعاودولو التربية من جديد و صح عسوه حتى روح للدار و دخلو عليه واحد بالكف و لوخر بالركل و البونيا المهم فسدولو خليقتو و ديدين تهور و هز ڨارنيتير و ضربو بيه للراس خلوه غارق في دمو و خرجو ...

غدوة عيطتلي جارتي قاتلي راجلك لقاوه مضروب و رانا هزيناه للسبيطار خيطولو راسو 14مساك ووجهو مابقى فيه ما يتشاف ...بابا بعث خاوتي لبيت جدي في ولاية أخرى كان متوقع يشكي بيهم زيد بصح هو قرر أنو لا مايشكيش ...

تعقدت حياتي و كل يوم ماشية و تزيد تتعقد أكثر ...

فاتت على الحكاية شهور و أنا في دارنا بابا و يما يجرو بيا من راقي لراقي و الحمد لله قالولهم رتاحت و تنحى منها السحر ...

رجعت نهدر معاه نورمال و هو ندم على هذاك النهار

<><>

الحلقة 10

خويا ديدين كان عصبي و تاع مشاكل و كان سامي ولد عم زيد ( خو صفاء ) صاحبو و هو وياه عقلية وحدة و نفس الطوايش. ..

كانو يتكيفو الزطلة و يشربو الشراب عياو فيه خاوتي بصح والو مازال في طبايعو ...

أنا رجعت مع حبيبي كيما قبل ...

زيد : خلاص توحشتك و باغي نشوفك ..

كاميليا : كيفاه نتلاقاو بعد المشكل هذاك ..

زيد : راكي مرتي يا دين الله اول مرة تصرى هذي

كاميليا : خلي يزيدو ينساو شوي و نرجع لحبيبي ...

زيد : بصح مابقيتش نصبر عليك خلاه ....غدوة أرواحيلي للدار دبري راسك راح نتفلق..

غدوة خليت معاذ ولدي عند ماما و قلتلها نروح للطبيب ...و رحت عند راجلي و حبيبي الي رجعت نرندف معاه بالسرقة كيما قبل ..

غير دخلت من الباب بدينا نبوسو في بعضانا حلاوة كبيرة و حب و حنانة تحرمنا منها من الشهر الأول تاع زواجنا ياكل فيا ماكلة ماخلى حتى بلاصة ماباسهاش و ممسهاش راقد فوقي في صدري في رقبتي راح يهبل حسيتو قداه محروم الله لا يربح الي حرمنا من بعضانا مارست الجنس مع راجلي حبيبي و أنا متمنية مايفضش الشعور الي راني نحس فيه ....

تفاهمنا انو خلاص لازم نرجعو مع بعضانا حتى لكن يضطر يكريلي بعيد على امو و أختو الأشرار ...ماقلتلكمش زيد من نهار تزوجنا مازالو هو الي يصرف على أمو و أختو رغم الي صرى كل و هم لا محمود و لا مشكور ...

رجعت للدار فوق السحاب نلم في حوايجي و نخمم واش راح نقول لماما و كيفاه راح نفهمها أني رايحة نرجع لراجلي ماهمني والو مستعدة نعمل كل شيء و نرجعو مع بعضانا و نربو ولدنا مسكين الي من الي زاد ما حسش بحنانة الأب ..

الليلة هذيك راقدة و نحلم بداري و راجلي ...حتى نسمع في ماما تعيط أجري يا كاميليا أجرييييي نخرج نلقاه ديدين خويا في التوالات يتقيا نجي نطل عليه نلقاه يتقيا في الدم و موش قادر يوقف على طولو .. ماما تعيط على بابا و هو قالها راهو شارب عندي ما راح نديرلو ...الله لا يردو ...

سقسيت ماما واش بيه ؟ قاتلي راهو جابو سامي خو صفاء و قالي راهو سكران .....رجعناه للاشومبر و هو غير يتقيأ و الدم هذاك ماحبش يفض ماما حاطتلو البسينة قدامو قريب تتعبا ...و يعيط غير راااااسيييي بتنا معاه على هذيك الحالة طيبتلو ماما الحليب و شربتهولو رجع وردي مخلط بالدم ثم عرفناها حاجة ڨراف....عيطنا لخاوتي نور الدين و نصر الدين الي كانو فيزوج مزوجين مع الفجر جاو يجرو هزوه للسبيطار قبل ما يوصل البقاء لله مات خوي

<><>

الحلقة 11

مات خويا الصغير بين يديا واش راح نقول لماما و أنا الي حلفتلها أنو درك نروح معاه و نجيبو ماشي على رجليه واش راح نقول لماما و أنا الي قلتلها خلي نروح في بلاصتك أرقدي مع معاذ شوي كي يطلع النهار طيبي القهوة و شوي عصيدة يفطر بيها ديدين كي يروح مات بين ذرعيا مات و هو حاكمني بالقوة من قوة الألم الي كان يحس بيه دموعو تهبط من عينيه و ماهبطش عينيه مني و هو يودع فيا و أنا مافقتش بيه دخلناه للسبيطار و أنا نعيط و نقلهم ماتقولوليش مات راني عملتلو الكروكي امس يفطر بيه ماتقولوليش مات راهو يقلي الي يرشك بالماء نرشو بالدم ....و صح قالولنا البقاء لله .. ..

مانروحش للدار راهي يما تستنى فيه ...مانروحش للدار ماعنديش الي يشريلي البوراك سخون مع العشية المهم أنا نبكي و نعيط و الي في السبيطار كل يبكو معايا ...

رجعت لدارنا بعد ما خليت حبيب قلب يما بارد في لامورڨ ...غير دخلت من الباب و قلنا لماما طاحت تغاشات واش نحكيلكم واش نخليلكم الموت مصيبة الله لا يوري حد فيها في عبد قريب ...

رضينا بالموت تاع ديدين الناس تعوزي فينا و نبكو شوي و نوقفو شوي ماما طايحة فراش معاها أم صفاء الي بكاتو أكثر من الي بكيناه حنا و صفاء كيف كيف جات من بلاد لبلاد غير باه توقف معايا و جاو الناس الي تستشفى حتى في الموت .. (عجوزتي و سلفتي )

و غير سمع زيد جاء يصبر فيا أنا نبكي و هو يبكي ...

حتى يجينا الخبر الي فضت معاه حياتي و أحلامي ...

قالولنا تقرير الطبيب الشرعي قرر أنو خويا ديدين مات مقتول بسبب ضربة من وراء وذنو عملتلو نزيف داخلي ...بدات التحقيقات و جابو سامي خو صفاء الي كان معاه و هو الي وصلو للدار الليلة هذيك ...

و في الأول قال ماعلاباليش من بعد إعترف أنو ليلة الموت كانو فيزوج سكرانين و ساهرين في بار خويا ربي يرحمو شرب و ماخلصش و حصلها في سامي و خرج و كي خرج سامي كان قلقان تعاركو بالهدرة و من بعد ولات عركة باليدين سامي قلق و نحى السانتورة تاع السروال و كانت فيها جمجمة تاع حديد هزها و ضربو بيها من ثم طاح خويا و بدأ يتقيا في الدم حتى وصلو للدار ماتخيلش يصرى الي صرى ...

<><>

الحلقة 12

هذي هي مصبية المصبية الشرطة دخلت حتى زيد في الحكاية و تهموه أنو هو الي حرض ولد عمو باه يقتل خويا ثأر للطريحة الي عطاوهالو ...

بصح مع التحقيقات ماما و بابا أكدو للشرطة انو ديدين (ربي يرحمو ) و سامي كانو كي الخاوة و مستحيل يكون قتلو متعمد ...سامي حكمو عليه بالحبس 7سنين و زيد مستحيل نقدر نزيد نخمم فيه خاتر مكتوبنا مانكونوش لبعضانا ...

ماما من بعد موت خويا توسوست و مرضت و ماصبرتش على فراقو و بابا قرر نبيعو الدار و نرحلو خاصة أنو علاقتها مع بيت صفاء ماقعدتش كيما كانت وحدة تبكي على ولدها الي مات و الأخرى تبكي على ولدها الي في الحبس ....

رحلنا لولاية أخرى و تقطعت العلاقات بيني و بين زيد من بعد ما تطلقنا و كل واحد راح في حالو مازالت القلوب غير ربي يعلم بيهم ...

<><>

الحلقة 13 و الاخيرة

_فاتت 6 سنين _

معاذ ولدي دخل يقرأ و هو كل يوم يسقسيني على باباه و أنا نخلق في الأسباب حتى فضو ...أنا خبروني أنو خرج مع العسكر بعد ما مرض نفسيا ناس تقول من السحر و العقاقير تاع أمو و أختو و ناس تقول من لادروڨ و علمها عند ربي ...أما الجزء المليح في الحكاية أنو ربي ما يضلمش و يمهل و لا يهمل ..

دوجة أم زيد تفلقت عليها لاكوكوت و تحرقت من راسها لرجليها و عينيها وحدة مابقاتش تشوف بيها و الأخرى نص نص أما العقرب تاع بنتها مازالت بايرة و من بعد ما حبست أمها في الشوكة و لصق فيها كلش ولات كي الكلبة المكلوبة مازلتلها حاجة باه تضمن تدخل للنار و هي عقوق الوالدين يحكو الجيران أنها نهار على نهار تحكم أمها تعطيها طريحة تخليها تبكي لربي الي خلقها (ربي يهدي ) .

أما أنا قريت عامين في السونتر سكريتاريا و شاركت في الكونكور تاع المساعدين التربويين و راني نخدم في ليسي المهم نصرف على ولدي زادو خطبوني بزاف بصح قلبي مازال عند زيد حتى بعد السنين هذي كل ....موحال نعشق غيرو ...

درك نحكيلكم على السمانة الي فاتت الي حيرت في قلبي المواجع كل ...رحت أنا و بابا و معاذ عند خالتي في المدينة الي كنا نسكنو فيها وصلنا للاسانتيفي وولدي قالي ماما نروح للتوالات ...بابا راح يهز قهوة و أنا رحت مع ولدي دخل ...واقفة نستنى فيه نطيش عيني نشوف منظر خلاني نبكي بالدموع شفت حبيبي، قلبي ،حب حياتي ...مفرش الكارتون و قاعد قدام ليتوالات ياكل في طرف خبز ...راحت اللحية البيان رازي و النظافة القش الي ريحة النظافة فيها تضرب على مترتين ...كان شعرو معبي غبار و طويل و مكشرد و لابس فردة وحدة تاع سباط و سروال موسخ و مقطع و الذبان يدور عليه باقية غير نشوف معاه قلبي تعصر ...خرج ولدي قالي ماما نروحو بعثتو عند بابا راح و أنا رحت عند حبيبي ...

هدر معايا راجل قالي بعدي عليه أمدام راهو يضرب ....بصح قدمت عندو من غير خوف قعدت قدامو و قتلو زيد عرفتيني ؟؟ كنت نبكي و غاضني علاه يا ربي علاه الدنيا عملت فيه هك ماعرفنيش و في نفس الوقت باقي غير يشوف في الأرض و أنا عبيت عينيا بشوفة العينين هذوك الي كنت نشوف معاهم و مانشبعش آه يا ربي علاه حبيبي ...مديتلو صوارد و رحت ماشية و حاجة تجبد فيا من التالي باغية نرجع ليه نحضنو نبوسو نقلو راني مازالني نحبك و نعشق فيك بصح مشيت و الدموع في عينيا ...

النهاية